خطيبة ابنى ( حكاوي شيمو

خطيبة ابني طردتني بسبب الموسم!
أنا عمري ما كنت أتخيل إن يوم من الأيام هروح أزور خطيبة ابني وأنا شايلة خير ابني بإيدي، وأرجع من عندها وأنا حاسة إني اتكسرت واتهانت قدام أهلها...
ابني مسافر ومخطوب، وقبل موسم مولد النبي بكام يوم كلمني وقال لي
يا أمي، أنا عايزك تنزلي إنتِ وأختي وتشتروا عروسة حلوة وعلبة حلاوة غالية، وتروحوا الموسم مكاني لخطيبتي، علشان متزعلش، وأنا عارف إن دي عوايدكم.
قولت له من عيوني يا ابني، دي خطيبتك وبنتنا، وربنا يتمملك على خير.
وفعلاً بعت لأخته فلوس، ونزلت اشترت عروسة جميلة وعلبة حلاوة غالية.
وأنا كنت بقول واحنا رايحين ناخد معانا فاكهة وساقع، ونفرح البنت وأهلها.
لكن قبل المولد بيوم، تعبت شوية وجالي برد شديد، وجوزي كان مش موجود، واضطريت أنام في السرير.
قولت لبنتي يا بنتي اتصلي بخطيبة أخوكي وقولي لها إني تعبانة، ولو أنا مش هقدر أروح، إنتِ تروحي مكانّي وتديها الموسم وتشرفي أخوكي قدام أهلها.
بنتي اتصلت...
لكن اللي ردت كان أم البنت.
قالت لها بنتي مساء الخير يا طنط، ماما تعبانة شوية وبتقول لو مقدرتش تقوم، أجي أنا مكانها أدي لأختي الموسم.
لكن رد أمها كان بارد جداً، وقالت لا يا حبيبتي، متجيش.
بنتي استغربت وقالت ليه يا طنط؟
ردت مينفعش... لازم والدتك هي اللي تيجي.
وبعدين قفلت المكالمة!
بنتي رجعت لي وهي متضايقة وقالت خلاص يا ماما، أنا مش رايحة.
قولتلها لا يا بنتي، كلميها تاني وقولي لها إن شاء الله يومين وأكون فوقت ونروح.
وفعلاً بعد يومين، قمت رغم إني لسه تعبانة، وقلت لازم أروح، دي أول مناسبة لخطيبة ابني، ومش عايزة حد يقول إننا قصرنا.
بس أنا مش اكتفيت بالموسم...
قولت ده خير ابني، ونفرح بيه الناس.
جهزت لها فاكهة وساقع، وزودت عليهم رز ومكرونة وزيت وعلبة سمنة بلدي ودقيق وبقوليات، لوبيا وفاصوليا بيضا وحمص شام، عشان عارفة إنها بتحبه.
وكمان أخدت كرنب، وبطتين، وأربع فراخ مدبوحين ومنضفين...
أنا وبنتي يوم الجمعة روحنا لهم.
دخلنا وقعدنا، أبوها دخل وقعد معانا، وبعد شوية أمها قدمت لنا واجب الضيافة.
وقعدنا...
ربع ساعة...
نص ساعة...
ساعة كاملة...
والبنت مش باينة!
بصيت لأمها وقلت هي فين يا حبيبتي؟
قالت نايمة.
قولتلها باستغراب نايمة؟! ما هي عارفة إننا جايين!
قالت تعبانة يا حجة.
قولتلها خلاص، قولي لها كل سنة وهي طيبة، وإن شاء الله السنة الجاية تقضي المولد معانا في بيت جوزها.
وبدأت أقوم علشان أمشي.
وفجأة...
البنت خرجت علينا!
لكن الصدمة إنها كانت لابسة لبس خروج!
بصيت لها وقلت إزيك يا بنتي؟ كل سنة وإنتِ طيبة.
بصت لي بوش متغير وقالت
أنا مش عايزة مواسم!
افتكرت إنها بتهزر، فقولت ليه يا بنتي؟ ده الموسم مخصوص ليكي، وابننا هو اللي باعت تمنه.
صرخت وقالت إنتوا فضحتوني قدام أهلي!
أنا اتصدمت فضحتك؟! ليه يا بنتي؟
قالت بنات عمي وبنات خالي وأصحابي كلهم جالهم موسم المولد وأنا لأ!
قولتلها بس يا حبيبتي، الموسم أهو قدامك!
قالت أنا مش عايزاه!
قولتلها طب ليه بس؟ إحنا جايين مخصوص علشان نفرحك.
قالت بمنتهى القسوة
أنا مش بنتك!
الكلمة دي وجعتني...
قولتلها ليه بتقولي كده؟ أنا بعتبرك بنتي.
ردت لو كنت بنتك بجد، مكنتيش زورتيني بعد الموسم!
قولتلها يا بنتي أنا كنت تعبانة، وأختك كلمتك قبلها وقالت لك الظروف.
قالت أنا مش عايزة أعذار!
وبعدين قالت طالما كده، أنا مش عايزة مواسم. وشكراً على الزيارة.
وقامت بمنتهى البرود وقالت لأمها
أنا خارجة مع صحابي.
ومشيت!
أنا وقفت مكاني مش عارفة أقول إيه...
بنتي كانت هتنفجر وتزعق، مسكت إيدها وقلت اسكتي يا بنتي، إحنا في بيت ناس.
استأذنا علشان نمشي.
لكن الصدمة الأكبر كانت لسه مستنياني...
أم البنت بصت على كل الحاجات اللي جايبينها، وقالت
خدوا الحاجات دي معاكم.
قولتلها إيه؟!
قالت خدوا الحاجة دي، إحنا مش محتاجينها.
أنا والله حسيت الأرض بتتهز من تحتي...
أنا ست كبيرة، وعندي أحفاد، وجاية شايلة خير ابني علشان أفرح خطيبته، وفي الآخر أرجع بالحاجة في إيدي!
بنتي بصت لي وقالت يلا يا ماما، ناخد حاجتنا ونمشي.
خدنا الحاجة ومشينا...
وطول الطريق بنتي كانت بتقول والله يا ماما لو أختي كانت معانا كانت بهدلتهم!
قولتلها اسكتي يا بنتي... أهم حاجة أخوكي، مش عايزة أقول له حاجة يخرب بيته.
ومن يومها...
لا أمها اتصلت، ولا البنت سألت، ولا حتى قالت لي كل سنة وإنتِ طيبة.
وابني كل شوية يتصل بيا...
وأنا مش برد.
ولو كلم أخته، تقول له ماما نايمة.
أو ماما مشغولة.
أو ماما تعبانة.
لحد ما ابني بدأ يحس إن في حاجة غلط...
وأنا مش عارفة أعمل إيه!
أقول له؟
أخاف يزعل ويتخانق مع خطيبته، وتبوظ الجوازة...
أسكت؟
وأفضل شايلة اللي حصل جوايا؟
والأغرب من كده...
خطيب بنتي نفسها خطيبته جاله موسم مكسور ومجبش لها حاجة، وهي ولا زعلت ولا عملت مشكلة!
أنا بقيت أسأل نفسي
ليه خطيبة ابني كانت مستنية الموسم بالشكل ده؟
وليه كان مهم عندها إن كل أصحابها وبنات عيلتها يشوفوا هي جالها إيه؟
وهل المشكلة فعلاً في الموسم؟
ولا كان فيه سبب تاني أنا لسه معرفتوش؟
لكن اللي حصل بعدها بيومين خلاني أحس إن الموضوع أكبر من مجرد علبة حلاوة وموسم مولد...
لأن ابني اتصل بأخته وقال لها
ماما مالها؟ أنا حاسس إنها بتتهرب مني... وخطيبتي قالت لي إن فيه حاجة حصلت يوم الزيارة وماما زعلانة منها!
أخته سكتت...
وابني قال لها
قوليلي الحقيقة... ماما قالت إيه لخطيبتي؟
وقتها أختي كانت على وشك تحكي له كل اللي حصل...
لكن قبل ما تنطق، وصلها منها رسالة قلبت الموضوع كله!
والرسالة دي كانت فيها كلام...
أنا نفسي ما كنتش أتوقعه أبداً!
يتبع...
تفاعل لايك كومنت وهنزل بالتكملة  
قولولي رأيكم بصراحة لو كنتوا مكاني، تقولوا لابنكم اللي حصل ولا تسكتوا علشان متخربوش عليه؟
ومتنسوش تصلوا على النبي ﷺ 
حكاوي_شيمو 
قصص_واقعية
حكايات_من_الواقع
خطيبة ابني طردتني بسبب الموسم... لكن الرسالة اللي وصلت لأختها كشفت سر محدش كان يعرفه!
فاكرين لما حكيت لكم إني رجعت من عند خطيبة ابني وأنا شايلة كل الحاجة اللي كنت واخداها لها؟
رجعت وأنا موجوعة مش علشان الموسم ولا علشان الفلوس...
أنا وجعني إن بنت كنت داخلة عليها وأنا بعتبرها بنتي، قالت لي قدام أبوها وأمها
أنا مش بنتك!
ومن ساعتها وأنا قررت ما أتكلمش مع ابني.
كل ما يتصل، أبعد الموبايل عني.
وأخته لما يرن عليها وتسأله ماما مالها؟
تقول له مفيش يا أخويا، تعبانة