بابا ضهره بيوجعه

راح قالهم اللي حصل
حماتي جت وشها مقلوب.. ايه اللي ابنك عمله ده؟ كسفنا قدام الناس كلها
قلتلها ابني معملش حاجة.. ابنك هو اللي كسفنا
حمايا قالي يا بنتي الراجل تعبان بجد.. الدكتور قايله راحة
قلتله يا عمي الدكتور قايله راحة من 3 شهور؟ طب ازاي شال شنطة 30 كيلو ولا اتهز؟ هو الدكتور قاله يشيل الستات بس ميشيلش بنته؟
سكت.. معرفش يرد
حماتي قالت طب لمي الدور.. الناس بتتفرج
قلتلها ما هو ده اللي انا بعمله بقالي 3 شهور.. بلم الدور.. بشيل البنت.. وبشيل الشنط.. وبشيل البيت كله لوحدي.. واقول معلش تعبان.. بس خلاص.. انا تعبت
دخلت الاوضة لقيت جوزي نايم على السرير وماسك ضهره.. اول ما شافني قال ضهري هيموتني من شيل الشنطة
بصيتله بقرف.. بجد؟ دلوقتي افتكرت؟
قالي انتي هتعملي حوار؟ شلت شنطة لواحدة ست محتاجة مساعدة.. فيها ايه؟
قلتله فيها انك بقالك 3 شهور مش قادر تشيل بنتك اللي من لحمك ودمك.. 6 كيلو.. وتقدر تشيل شنطة واحدة غريبة.. عشان حلوة ولابسة ابيض؟
قالي انتي بتغيري؟
ضحكت.. ضحكة من كتر القهر.. اغير؟ اغير من ايه؟ من واحدة شايلة شنطتها وانا شايلة عيلة كاملة؟ انا مش بغير.. انا قرفانة
قام وقف.. انا مش هسمحلك تكلميني كده
قلتله هتعمل ايه؟ هتوجع ضهرك؟
سكت
قلتله بص.. انا هقولك كلمتين.. الرحلة دي 5 ايام.. انا هكملها عشان خاطر ابني وعشان خاطر اهلك اللي دافعين.. بس من النهاردة.. انا مش هشيل لوحدي.. بنتك هتشيلها زي ما بتشيل شنط الستات.. هتغيرلها.. هتصحى بيها بالليل.. هتعمل كل حاجة.. ولو ضهرك واجعك بجد.. نروح لدكتور هنا في المركب حالاً.. ويكشف.. وقدام الناس كلها.. لو طلع عندك حاجة انا هعتذرلك قدام المركب كله.. ولو معندكش.. يبقى انت كذاب.. وانا ساعتها هعرف هعمل ايه
وشه جاب الوان.. انتي بتهدديني؟
قلتله لا.. انا بديك فرصة اخيرة.. عشان ابني اللي لسه بيشوفك بطل.. وميشوفكش كذاب
في اللحظة دي الباب خبط.. كان ابني.. داخل ومعاه بنتي شايلها.. ماما.. اختي عايزاكي
بصيت لجوزي.. شايف؟ ابنك اللي عنده 7 سنين شايل اخته.. وانت مش قادر
جوزي سكت خالص.. وبعدين وطى راسه.. عندك حق
اول مرة من 3 شهور يقولها
قعد على طرف السرير وقال انا مكنش ضهري واجعني اوي.. في الاول كان واجعني شوية.. وبعدين اتعودت انك بتعملي كل حاجة.. وبقيت بستسهل.. ولما الست طلبت مساعدة.. اتكسفت اقول لا قدام الناس
قلتله يعني بتتكسف من الناس الغريبة.. ومبتتكسفش من مراتك؟
مردش
قلتله قوم شيل بنتك.. قوم وري ابنك انك تقدر تبقى اب بجد.. مش بطل في عين واحدة غريبة لمدة دقيقة.. وتبقى ولا حاجة في عين ولادك طول العمر
قام.. شال البنت.. لاول مرة من 3 شهور.. البنت بصتله واستغربت.. كأنها مش عارفاه
وابني واقف على الباب بيضحك.. اخيرا
ومن ساعتها.. طول الرحلة.. هو اللي كان شايل البنت.. طالع نازل بيها.. والناس في المركب كل ما تشوفه تقول اهو البطل شال بنته المرة دي
وكل مرة كان وشه يحمر ويسكت.. لانه عارف انه كان يستاهل كل كلمة ابنه قالها في المايك.
بعد ما جوزي شال البنت اول مرة من 3 شهور.. انا كنت فاكرة ان الموضوع خلص.. وانه خلاص فوق لنفسه.. بس اللي حصل بعد كده كان اوسخ بكتير من حوار الشنطة
احنا كنا لسه في اول يوم في الرحلة.. والمركب كان لسه طالع.. ولسه قدمنا 4 ايام كاملين محبوسين مع بعض في اوضة واحدة.. انا وهو والواد والبيت
بالليل.. بعد ما الولاد ناموا.. هو قعد على البلكونة بتاعة الاوضة.. وانا طلعتله
قلتله على فكرة انا مش زعلانة عشان الشنطة.. انا زعلانة عشان بقالي 3 شهور بقولك انا تعبانة.. انا ضهري بيتكسر.. انا مش بنام.. وانت كل مرة تقولي معلش.. اصلك متعرفيش وجع الضهر
بصلي وقالي ما انا قلتلك عندك حق
قلتله لا.. انت مقولتش عندك حق عشان مقتنع.. انت قلتها عشان اتكسفت قدام الناس.. في فرق كبير
سكت شوية وبعدين قال الجملة اللي خلتني افهم كل حاجة
قال انتي بقيتي ام.. خلاص.. مبقتيش الست اللي اتجوزتها
سألته يعني ايه؟
قال يعني طول النهار ريحتك لبن.. وشعرك ملموم.. وبتتكلمي عن البامبرز والترجيع.. انا مبقتش شايف مراتي.. انا شايف مربية للعيال
الكلمة نزلت على ودني زي القلم
قلتله امال انت فاكر الجواز ايه؟ فاكر الخلفة ايه؟ ما انا بعمل كده عشان انت مش بتعمل.. لو انت كنت بتشيل معايا.. كنت هتلاقي وقت استحمى.. وسرح شعري.. والبس فستان ابيض زي الست اللي جريت تشيلها شنطتها
قالي انتي بقيتي نكدية اوي
قلتله لا يا حبيبي.. انا بقيت مرهقة اوي.. وانت بقيت اناني اوي.. ودي مش نكد.. ده قرف
قفلنا الكلام ونمنا.. بس انا منمتش.. فضلت صاحية طول الليل ببص للسقف.. وبسأل نفسي هو امتى اتغير كده؟ هو كان كده من الاول وانا مكنتش واخدة بالي؟
تاني يوم الصبح.. نزلنا نفطر.. والمطعم بتاع المركب كان زحمة.. وكل الترابيزات مليانة.. فجأة لقينا الست بتاعة الفستان الابيض قاعدة لوحدها.. وشاورتلنا.. تعالوا اقعدوا معايا.. فيه مكان
جوزي قبل ما انا ارد.. قال يلا
قعدنا.. والست طلعت ست لطيفة جدا.. وطلعت مسافرة لوحدها.. وجوزها ميت بقاله سنتين.. وعندها بنتين كبار.. وقعدت تحكي مع ابني.. وابني حبها اوي
وبعدين بصتلي وقالتلي على فكرة جوزك راجل محترم اوي.. وشهم.. قليل لما تلاقي راجل كده دلوقتي
انا بصيت لجوزي.. لقيته مبتسم.. نفس الابتسامة