بابا ضهره بيوجعه

بتاعة امبارح.. الابتسامة اللي مشفتهاش بقالي شهور
قلتلها اه.. محترم اوي.. لدرجة انه مشالش بنته بقاله 3 شهور عشان ضهره.. بس شال شنطتك اللي 30 كيلو في ثانية
الست وشها احمر.. نعم؟
جوزي بصلي بصة نار.. على فكرة احنا اتكلمنا في الموضوع ده وخلص
قلتله لا مخلصش.. مخلصش جوايا.. وانت عارف كده كويس
الست فهمت ان فيه مصيبة.. قامت قالت انا هقوم اجيب قهوة ومشيت
ابني كان قاعد وسامع.. واول ما الست مشيت.. قال لابوه.. بابا هو انت ليه كنت بتساعد طنط ومش بتساعد ماما؟ هو طنط ضهرها مش بيوجعها زي ماما؟
جوزي معرفش يرد.. قام ساب الترابيزة ومشي
انا خدت الولاد وطلعت على الدور اللي فوق.. اللي فيه البسين.. وقعدت.. كنت محتاجة افكر.. هو انا هكمل ازاي؟
بعد شوية لقيت حماتي جاية.. قعدت جنبي.. مالك؟
حكيتلها.. كل حاجة.. من اول 3 شهور لحد كلمة انتي بقيتي مربية
حماتي سكتت شوية وبعدين قالتلي جملة عمري ما هنساها
قالتلي ابني انا اللي مربياه.. وعارفة انه اناني.. ابوه كده.. وانا دلعته.. كنت فاكرة ان الجواز هيعدله.. بس شكله مفيش فايدة.. انتي استحملتي كتير يا بنتي
قلتلها طب اعمل ايه؟
قالتلي الرحلة دي فرصة.. خليه يشيل.. خليه يجرب.. خليه يحس.. ولو مرجعش راجل.. ارجعي بيت اهلك.. وانا هقف معاكي.. مش معاه
اول مرة حماة تقول لمرات ابنها كده
في اخر يوم في الرحلة.. كان فيه حفلة كبيرة.. والكابتن بتاع المركب عامل مسابقة.. مسابقة مين يشيل مراته ويمشي بيها.. حاجة هزار كده
المذيع قال في المايك مين الراجل الشهم اللي هيشيل مراته؟
كل الستات بتبص على اجوازها وتضحك.. والرجالة بتضحك
ابني قام.. راح خد المايك تاني.. الناس كلها افتكرت اللي حصل اول يوم.. فالكل سكت
ابني قال انا عايز بابا يشيل ماما المرة دي.. عشان ماما بقالها كتير اوي محدش شالها
القاعة كلها سقفت.. وبقت تقول شيلها.. شيلها
جوزي اتحرج.. بس المرة دي مقدرش يمثل ان ضهره بيوجعه.. لان الناس كلها عارفة
قام.. قرب مني.. وشالني.. وانا شايلة البنت.. يعني شالنا احنا الاتنين
الناس كلها سقفت وصفرت.. وابني كان بيتنطط من الفرحة
وانا كنت بعيط.. مش عشان شالني.. عشان بقالي كتير اوي مستنية حد يشيل عني.. حتى لو دقيقة.. حتى لو هزار قدام الناس
لما نزلني.. همس في ودني.. حقك عليا.. انا كنت عيل
ومن يومها.. لحد النهاردة.. بقالنا 4 شهور راجعين من الرحلة.. وهو اللي بيصحى بالليل يغير للبنت.. وهو اللي بيشيلها.. وهو اللي بيعمل كل حاجة.. مش عشان ضهره خف.. عشان فهم ان الضهر اللي بجد اللي كان واجعه.. هو ضميره
وابني لحد النهاردة كل ما يشوف حد بيقول ضهري بيوجعني.. يقوله هات المايك احكي للناس؟